Tîm yn llwyddo cael cit newydd diolch i arian parod a gafodd ei gymryd oddi ar droseddwyr
Mae dyn ifanc hefo awtistiaeth wedi siarad yn wefreiddiol am sut mae clwb rygbi gallu cymysg yng Ngogledd Cymru wedi trawsnewid ei fywyd yn llwyr.
Ar ôl ymuno hefo Stingrays Bae Colwyn, gwnaeth Dylan Evans, 23, o Waunfawr, ger Caernarfon, ffrindiau newydd, serennu mewn cyfres deledu hefo arwr rygbi a sicrhau cyflogaeth hefo Undeb Rygbi Cymru (URC).
Adroddodd Dylan ei stori “ysbrydoledig” yn ystod cyflwyno grant o £1,500 gan Ymddiriedolaeth Heddlu a Chymuned Gogledd Cymru (PACT), gan ddefnyddio arian a gymerwyd oddi ar droseddwyr.
Mae PACT yn canolbwyntio bennaf ar ddarparu cyllid i grwpiau cymunedol a gwirfoddol ar gyfer cynlluniau sy’n gwella ansawdd bywyd pobl drwy leihau trosedd neu ofn troseddau.
Dros y chwarter canrif diwethaf mae dros 3,500 o brosiectau ar draws cymunedau ym mhob un sir yng ngogledd Cymru wedi elwa o gyllid gan y sefydliad.
Hyd yn hyn, nid oedd gan y Stingrays, sydd â’u 39 aelod yn dod o ardal eang o Ddolgellau i Lannau Dyfrdwy, git ond mae hynny wedi’i unioni diolch i’r rhodd a ddefnyddiwyd hefyd i brynu esgidiau rygbi a siacedi dal dŵr.
Mae’r tîm yn cael ei redeg gan wirfoddolwyr ac mae’n gysylltiedig hefo clwb rygbi Bae Colwyn, ac yn hyfforddi ac yn chwarae ar eu cae yn Llandrillo-yn-Rhos.
Yn ôl Dylan, roedd hefo diddordeb mewn chwaraeon erioed ond roedd bod yn awtistig wedi rhwystro ei hyder, ac roedd wedi bod yn amharod i chwarae gemau tîm.
Ond, ar ôl clywed am y Stingrays, penderfynodd ei fod yn ffordd dda o gadw’n heini.
Dywedodd: “Roeddwn i’n gweld fy mod i’n dda mewn rygbi ac yn gwneud ffrindiau newydd ac roeddwn i’n mwynhau mynd i gemau.”
Denodd ei alluoedd gynhyrchwyr rhaglen S4C, Stryd i’r Sgrym, cyfres a ddilynodd gyn seren Cymru a Llanelli, Scott Quinnell, wrth iddo greu tîm newydd o’r dechrau.
Dywedodd Dylan: “Yn ystod y ffilmio fe wnaethon ni gwrdd hefo rhai o chwaraewyr Cymru, fel cyn chwaraewr Cymru a Llanelli Scarlets, Ken Owens, a hyd yn oed y cyn hyfforddwr Warren Gatland wrth hyfforddi hefo tîm Cymru. Fe wnaethon ni chwarae yn Llundain ac ennill a oedd yn wych.”
Yn ystod y misoedd diwethaf mae Dylan wedi bod yn helpu sesiynau gweithgareddau chwaraeon wythnosol yng Nghanolfan Addysg y Bont yn Llangefni ac yng ngemau cartref RGC ym Mharc Eirias.
Mae mam Dylan, Jackie, yn hapus i weld y newid yn ei mab.
Dywedodd: “Mae wedi bod hefo diddordeb mewn chwaraeon erioed ond roedd hefyd yn eithaf swil ac felly mae ymwneud hefo’r Stingrays wedi bod yn wych iddo.”
Dywedodd Ashley Rogers, cadeirydd PACT, a gyflwynodd y siec i swyddogion y clwb: “Y Stingrays oedd y tîm gallu cymysg cyntaf yng Ngogledd Cymru a ‘da ni’n falch iawn o’u helpu nhw.
“Maen nhw’n gynhwysol iawn ac mae’n bwysig iawn bod pob aelod o’r gymuned yn gallu cael mynediad at chwaraeon ac mae PACT yn falch iawn o fod yn rhan o hynny.
“Mae clywed am y gwahaniaeth gwirioneddol y mae’n ei wneud i fywydau’r chwaraewyr yn tanlinellu pwysigrwydd helpu’r Stingrays. Mae Dylan a’r holl chwaraewyr eraill yn ysbrydoliaeth fawr – maen nhw’n bobl y gallwn ni i gyd ddysgu oddi wrthyn nhw.”
Croesawyd y newyddion am y grant hefyd gan ei gyd-chwaraewr Lowri Evans-Hughes, 30, o Fochdre, ger Bae Colwyn.
Mae hi eisoes yn chwaraewr profiadol ar ôl chwarae sawl gwaith i dimau MARI (Rygbi Gallu Cymysg Trwy Wahoddiad) a Merched Cymru.
Ym mis Mehefin cafodd ei chynnwys yng ngharfan Merched Cymru a gymerodd ran mewn gŵyl yn Pamplona, Sbaen.
Dywedodd: “Roedd yn hwyl fawr. Fe wnaethon ni chwarae pum gêm mewn chwe diwrnod ac ennill pob un ohonyn nhw.”
Roedd Lowri yn cael cwmni ei mam, Debbie, ar y daith a oedd hefyd yn y garfan chwarae.
Dywedodd Debbie: “Roedd cynrychioli Bae Colwyn a Chymru yn rhyngwladol yn foment enfawr i Lowri a wnaed yn bosibl trwy help y Stingrays.
“Ac mae fy nhaith rygbi fy hun wedi mynd yn fythgofiadwy – cynrychioli Cymru ochr yn ochr â Lowri.
“Fe wnaethon ni chwarae yn erbyn timau o Ganada, Sbaen, Iwerddon a’r Unol Daleithiau a chawson ni ein trechu ar y funud olaf yn erbyn tîm o’r Eidal. Roedd yn dwrnamaint gwych ac yn brofiad gwych i bob un ohonon ni.”
Ychwanegodd Isaac Jones, sy’n byw yn Rhuallt, ger Llanelwy: “Dwi’n mwynhau chwarae rygbi a dwi’n meddwl fy mod i’n eithaf da. Mae’n wych chwarae gemau a mynd i lefydd newydd.”
Dywedodd rheolwr tîm Stingrays, Dafydd Curry, swyddog sy’n gwasanaethu hefo Heddlu Gogledd Cymru, fod y clwb wedi ei ffurfio tua chwe blynedd yn ôl.
Dywedodd: “‘Da ni’n griw cymysg o bobl. Mae yna rai fel fi, a allai gael eu galw’n gyn chwaraewyr ond nad ydyn nhw eisiau rhoi’r gorau iddi eto. Mae yna rai sydd dros 60 oed. Yna mae yna rai sy’n ddigartref neu’n ddi-waith a’r rhai sy’n byw hefo cyflyrau fel Syndrom Down, awtistiaeth ac ADHD. Mae croeso iddyn nhw i gyd yma.”
Dywedodd: “‘Da ni’n chwarae rygbi cyswllt llawn am 80 munud yn erbyn y timau eraill yng Nghymru a’r rhai dros y ffin yng Ngogledd Orllewin Lloegr.
“Mae hynny’n golygu teithiau hir mewn bysiau mini, ond dydyn ni ddim yn rhoi gormod o bwyslais ar y canlyniadau wrth i’r teithio ychwanegu at y teimlad o berthyn ac integreiddio ymhlith y chwaraewyr. Mae’r cyfeillgarwch yno i bawb ei weld ac mae’n wych gweld sut mae personoliaeth pob chwaraewr yn datblygu wrth i ni fod hefo ni’n hirach.”
Y grant ydy’r eildro i PACT helpu Stingrays Bae Colwyn.
Dywedodd SCCH Naomi Hill, a gefnogodd y cais diweddaraf am gyllid: “Mae’r clwb hwn yn adnodd pwysig i oedolion ifanc anabl a allai ei gweld hi’n anodd cymryd rhan mewn gweithgareddau cymdeithasol eraill.
“Mae’n cynnig amgylchfyd saff a chefnogol sy’n werthfawr i bobl ifanc sy’n wynebu heriau fel ymddygiad neu broblemau iechyd meddwl – unigolion a allai fel arall gymryd rhan mewn ymddygiad gwrthgymdeithasol neu weithgarwch troseddol mwy difrifol.”