PACT yn datblygu sgiliau i bobl ifanc sydd wedi dioddef yn fawr oherwydd cyfyngiadau symud y pandemig

Mae prosiect amgylcheddol sy’n ceisio rhoi sgiliau yn y gweithle i bobl ifanc sydd wedi’u taro’n galed gan gyfyngiadau symud y pandemig wedi cael cefnogaeth elusen gymunedol.

Mae Cyfeillion y Cob ar Ffordd y Gors, yn y Rhyl wedi cael  offer newydd sbon i’w eu gweithdy coed gan Ymddiriedolaeth Heddlu Gogledd Cymru a’r Gymuned (PACT).

Bydd amrywiaeth o lafnau ar gyfer y bwrdd gwaith trydan, sy’n cynnwys peiriannau cylchlif, a llif meitr yn ogystal â mygydau llwch ar gael i’w defnyddio i helpu pobl leol sydd wedi dioddef yn arw oherwydd hunain-ynysu yn ystod cyfnod y cyfyngiadau symud er mwyn iddynt allu cael profiad, sgiliau a chymwysterau i’w helpu i ddatblygu gyrfaoedd newydd.

Mae’n rhan o brosiect cymunedol mawr gan y Cyfeillion sy’n cynnwys meithrinfa blanhigion fechan sef Y Sied Blannu, tyfu blodau a llysiau i’w gwerthu, melin goed sy’n werth £11,000, y gweithdy coed a chynlluniau i drawsnewid tir gwastraff sydd wedi gordyfu yng Nglan Morfa, ger Ffordd y Gors, yn erddi a pherllan.

Dywedodd yr aelod lleol o Gyngor Dinbych, y Cynghorydd Pete Prendergast, sy’n Gadeirydd Y Cyfeillion: “Cefndir y syniad am weithdy yw er mwyn darparu rhywbeth i bobl dros 16 oed nad oedd yna unrhyw beth wedi’i ddarparu ar eu cyfer mewn gwirionedd.

“Mae gennym hyd at chwech o bobl yno yn dysgu sgiliau gwaith coed traddodiadol a gallent hyd yn oed ennill NVQ Lefel Un gydag o leiaf dri chwmni lleol sydd â diddordeb eu cyflogi.

“Pobl ifanc yw’r rhain, na fyddai rhai ohonynt byth yn gadael eu hystafelloedd, sydd wedi magu hyder a phwrpas gwirioneddol mewn bywyd ar ôl cymryd rhan yma., Cymaint fel bod bron yr holl bethau a ddefnyddir yma wedi cael eu gwneud yn y gweithdy acw.”

Ymhlith y rhai sy’n elwa mae Lee Hinchliffe, 37 oed o’r Rhyl, a ddywedodd: “Rwyf wedi bod yma ychydig dros ddau fis ac mae wedi newid fy mywyd.

“Roeddwn i wedi cloi fy hun i ffwrdd oherwydd Covid ond roeddwn i’n meddwl y byddwn i’n rhoi cynnig ar hyn ac wedi dysgu cymaint yn barod a gobeithio y byddaf yn rhan o redeg y felin goed pan ddaw yma.

“Oni bai am y lle yma byddwn i’n dal i gloi fy hun yn fy ystafell.”

Ymwelodd Cadeirydd PACT, Ashley Rogers, o Brestatyn, â’r clwb ynghyd ag Uchel Siryf Clwyd, Steve Thomas, a dywedodd: “Yr hyn rwy’n ei hoffi mewn gwirionedd yw ei fod mor hollgynhwysol yma ac yn rhychwantu’r gymuned gyfan, o 16 i 60.

“Mae hefyd yn rhoi cyfle i bobl ifanc yma ddysgu sgiliau newydd a meithrin eu hyder mewn amgylchedd ddiogel a chyfeillgar tra’n cefnogi cymunedau cynaliadwy ac economi gylchol.

“Rwy’n hapus iawn bod PACT yn gallu cefnogi prosiect mor werth chweil drwy ddarparu cyllid ar gyfer offer hanfodol.

“Mae’r gallu i ryngweithio ag eraill mewn lleoliad cymdeithasol ond diogel wrth ddysgu sgiliau newydd, yn enwedig ar ôl 18 mis o gyfyngiadau symud Covid, mor bwysig pan fydd cymaint o bobl wedi’u hynysu’n gymdeithasol.

“Mae maint y prosiect yma wedi creu argraff fawr arnaf ac rwy’n falch ein bod wedi gallu helpu drwy ddarparu cyllid allweddol.

“Dylai Cyfeillion y Cob fod yn falch o’r gwahaniaeth y maent yn ei wneud yn y Rhyl ac mae camau nesaf y prosiect yn edrych hyd yn oed yn fwy cyffrous i’r gymuned leol.”

Gwnaed y cais i PACT gan Anna Algieri, Swyddog Cefnogi Cymuned yr Heddlu a ddywedodd: “Mae Cyfeillion y Cob yn gweithredu yn un o’r ardaloedd mwyaf difreintiedig yng Nghymru ac yn cynnig cyfle i ddysgu sgiliau newydd a magu hyder a sgiliau bywyd.

“Mae’n cael ei ystyried yn amgylchedd diogel a chyfeillgar ac yn gyfle i ddysgu heb fod angen talu am ddeunyddiau neu offer drud.

“Mae’r gweithdy’n cael ei redeg gan wirfoddolwyr lleol sydd wedi gwneud yr elusen yn groesawgar iawn i bobl sy’n dioddef o anableddau dysgu a phroblemau iechyd meddwl gan eu bod yn gallu mynychu a bod yn nhw eu hunain sy’n annog eu gallu i ddysgu.”

Mae prosiect Cyfeillion y Cob yn un o lawer sydd wedi cael eu cefnogi gan PACT, elusen annibynnol a lansiwyd ym 1998 i gefnogi mentrau cymunedol, yn enwedig y rhai y mae’r heddlu’n ymwneud â hwy.

Yn y cyfnod hwnnw mae wedi helpu dros 2,500 o brosiectau, gan fuddsoddi mewn rhwng 70 a 100 o brosiectau bob blwyddyn mewn cymunedau ledled Gogledd Cymru.

Ychwanegodd Ashley Rogers: “I lawer sy’n ymwneud â’r prosiectau, dyma eu rhyngweithio cyntaf gyda’r heddlu, felly gall gwneud hyn yn brofiad cadarnhaol arwain at ganlyniadau dwfn ar eu dewisiadau bywyd yn y dyfodol.

“O Wynedd yn y gorllewin i Sir y Fflint a Wrecsam yn y dwyrain, mae PACT yn parhau i gefnogi prosiectau sy’n galluogi datblygu cymunedol cadarnhaol a chynaliadwy ac nid yw hyn erioed wedi bod yn bwysicach nag ar hyn o bryd yng nghanol pandemig Covid-19.”

Mae PACT yn cynnig amrywiaeth o grantiau o hyd at £2,000 ar gyfer prosiectau cymunedol – am fwy o fanylion a sut i wneud cais ewch i https://www.pactnorthwales.co.uk/applications-ceisiadau/